Die vermeende renosterstroper wat Sondag glo op polisie- en weermaglede op 'n plaas buite Otavi losgebrand het, het vanoggend in dié dorp se landdroshof verskyn. Mnr. Joseph Ngoma (42) het op klagte van die onwettige jag van beskermde wild, asook die besit van 'n renosterhoring en 'n ongelisensieerde vuurwapen en ammunisie verskyn. 'n Klag van poging tot moord is bygevoeg omdat hy Sondag glo op 15 polisie- en weermaglede geskiet het toe hulle hom in hegtenis wou neem.