Granitiese gesteentes van laat-Damara ouderdom in die noordelike Sentrale Sone van die Damara-orogeen word in die Okombahe- en Kawab-stollingsassosiasies onderverdeel. Eersgenoemde, wat radiometriese ouderdomme van 553 M.a. tot 514 M.a. gelewer het, bestaan uit die Okombahe-tipe granodioriet, die Orotsaub-monsograniet en die Okandjou-leukograniet en is beperk tot die sones tussen die tingordels. Hierdie gesteentes is na -D1 maar voor-D2 , ingeplaas. Die Kawabstollingsassosiasie bestaan uit die Okamborombonga-kwartsdioriet, die Baukwab-tipe granodioriet, die Kawabmonsograniet, die Okondeka-graniet en die Etendero-graniet met ouderdomme van 479 m.a. tot 459 M.a. Hierdie gesteentes kom hoofsaaklik in die suidelike en sentrale tingordels voor en is sin- tot na-D3 ingeplaas.